إذا كنت بتعاني من الشعور بالغثيان أو القيئ لأي سبب من الأسباب ( بسبب مرض معين أو بسبب أي أدوية بتاخدها) فالنصايح اللي جاية دي هتساعدك جدا في إنك تسيطر على الشعور دا (طبعا مع علاج السبب)
- إذا كنت بتعاني من القيئ فممنوع تماما إنك تاخد أي أكل أو شرب إلا بعد توقف القيئ دا تماما
- أما إذا كنت حاسس فقط بالغثيان (بدون قيئ) خد الدوا المناسب لحالتك ( ودا طبعا تبعا للسبب) وبعد ساعتين من الدوا ممكن تبدأ تاكل وتشرب وهقولك تاكل وتشرب ايه
أولاً لازم تبعد تماما عن:
المقليات – الأكل السخن – الأكل اللي ليه ريحة قوية – الأكل الحار ( اللي محطوط ليه فلفل وشطة وكاري) – وكمان الأكل اللي بيحتوي علي كمية كبيرة من السكر
لإن كل اللي فات دا هيزود الشعور بالغثيان والرغبة في القيئ
السؤال… اكل ايه وازاي؟؟؟
حنبدأ بأكل وشرب يكون سهل المضغ والبلع والهضم
هتبدأ بأكل وشرب يكون سهل المضغ والبلع والهضم، فهنبدأ بالماية أو المياه الغازية الشفافة بعد تقليبها، أو هتاخد شوربة فراخ بلدي بعد تصفيتها كويس من البصل، وممكن كمان عصير تفاح أو عصير عنب طبيعي متصفي كويس بدون إضافة سكر، وكمان ممكن ناخد شاي خفيف أو جيلي
بس خد بالك أيا كان اللي هتاخده مش هتاخد منه كميات كبيرة
- هتبدأ معلقة صغيرة كل 10 دقايق
- وبعيدين هتزودها لمعلقة كبيرة كل 20 دقيقة
- وبعدين تاخد 2 معلقة كبيرة أو ربع كباية كبيرة كل نص ساعة
ولو حسيت إن إحساسك بالغثيان أحسن، أو إن القيئ وقف أو لسه بيحصل لكن بمعدلات أقل، ممكن تاخد حاجة من الحاجات دي هتساعدك جدا:
توست أبيض – بطاطس مسلوقة – مكرونة مسلوقة – زبادي لايت – رز بلبن أو كاستر أو بودينج أو مهلبية والأفضل تكون معمولة بلبن خالي الدسم وبسكر بسيط – فراخ منزوعة الجلد مشوية أو مسلوقة – وكمان ممكن تاخد تفاح أو كمثرى مسلوقة
بس خد بالك وانت بتاخد الحاجات دي :
- خد كميات صغيرة وكلها ببطئ
- متشربش وانت بتاكل
- إفصل بين الشرب والأكل بنص ساعة
- لما تشرب متشربش كميات كبيرة مرة واحدة، الأفضل تشرب رشفات صغيرة
- لما تاكل بلاش الأكل يكون سخن، خد الأكل في درجة حرارة الغرفة العادية أو وهو ساقع لإن الأكل السخن وكمان الأكل اللي ليه ريحة قوية هيسبب إحساس بالغثيان او القيئ مرة تانية
- إذا كان الغثيان دا بيحصل الصبح (والنصيحة دي موجهه للسيدات الحوامل ) فحاولي تاخدي قبل ما تقومي من السرير مقرمشات مملحة أو توست ناشف دا هيقللك كتير الإحساس بالغثيان
