عشان مدونتنا هدفها نشر الوعي في مجال التغذية العلاجية ،حبيت أوضح لكم في الأول…
يعني إيه تخصص التغذية العلاجية؟
هل هو زي ما كلنا بنسمع و بنقول يعني التخصص اللي بيعالج السمنة و النحافة…. هل ده كل دوره ؟ الدايت ؟ الحقيقة لا
ببساطة هو تخصص دوره مهم جدًا في الحماية من الأمراض المختلفة وعلاجها عن طريق التغذية ، يعني لو الحالة بتعاني من مرض مزمن ، دوري أوضح لها تاكل إيه يساعدها ومتاكلش إيه ممكن يتعبها .
مش بس كده ده الأكل ممكن يزود فاعلية أدوية معينة بتستخدم في العلاج
فمثلا لو بيجيلي حالة مريض ضعف مزمن في وظايف الكلى مهم جدًا بالإضافة للعلاج اللي بياخده إنه ينظم كمية البروتين و الأملاح المختلفة في أكله …. ده مش بس مهم ده ممكن يحميه من – أو علي الاقل يأخر الوصول – لمرحلة الغسيل الكلوي
أما مثلاً مريض ارتجاع المرئ ،فبيحتاج نظام تغذية منخفض الدهون و بيحتاج كمان تنظيم مواعيد الوجبات و البعد عن أصناف معينة بتزود أعراض ارتجاع المريء
وده بيلخصلنا فكرة إن كل مريض بنوصفله نظام غذائي يناسب حالته، وإن شاء الله هكون معاكم بنفسي علشان نعرف أهم النصايح الغذائية لمختلف الأمراض .
أي حد عنده مشكلة صحية أو عايز يستفسر عن أي حاجة ليها علاقة بالتغذية العلاجية يسيب كومنت وهرد عليه فورًا
دمتم أصحاء
د/ هند حسين
يعني اسمه تخصص /أودكتور تغذية علاجية مش تخصص /اأو دكتور دايت
