عملت عملية…لازم تاكل كويس

لو مريت بتجربة إجراء جراحة لاي سبب من الاسباب أكيد أكتر جملة هتسمعها “لازم تاكل كويس” لكن للأسف وانت بتسمعها مش بتكون عارف ايه الكويس دا؟؟!!!
ياتري الكويس دا يعني تاكل كتير ولا تشرب العصاير اللي كتير من زوارك داخلين بيها ولا تسيب كل دا وتطلب اكله حلوه علي كيفك من برة

علشان كدا عايزة أوضح لكم يعني ايه الاكل الكويس بعد العملية .. ودا علشان نفهمه لازم نعرف كدا بسرعة هو جسمك بعد العمليه محتاج ايه

جسمك محتاج 4 حاجات مهمة جداً:

الأول بروتين

ودا أهم حاجة بتحتاجها بعد العملية علشان جسمك يقدر يعوض و يجدد كل الخلايا اللي ادمرت بعد الجراحة

وكمان لأنك بتفقد بروتين من مكان الجرح نفسه والبروتين دا تقدر تاخده من :

السمك والفراخ ومنتجات الألبان والبيض والمكسرات

أما اللحمة الحمراء فأنصحك تأجلها شوية بعد العملية لإن هضمها أصعب من هضم السمك والفراخ

وهفكرك بمعلومة كدا علي الماشي إن الأكل دا مش بيديك بروتين وطاقة بس إنما كمان هيديك عنصر مهم جدا وهو الزنك ودا أساسي لبناء البروتين جوا الجسم والحفاظ على المناعة

وكمان هوصيك مع كل وجبة أول يومين تلاته بعد الجراحة تضيف الزبادي لإنه فيه البكتيريا المفيدة اللي بتساعد علي الهضم ولإنه بعد العملية أكيد هتاخد مضاد حيوي بيدمر البكتيريا المفيدة في الجهاز الهضمي فالزبادي هنا مهم جدا لتعويضها

تاني حاجة فيتامين سي

ودا أهم فيتامين بتحتاجه بعد العملية …اشمعنا يعني فيتامين سي بالتحديد؟! أكيد لأنه مهم جدا للمناعة زي ما كلنا عارفين لكن الدور الأهم لفيتامين سي هنا هو تكوين الكولاجين اللي بيكون النسيج الضام في جسمك يعني بيكون الجلد وطبعا دي خطوة مهمة جدا لإلتئام الجرح

واحب اطمنك إن فيتامين سي تقدر تاخده من الأكل بسهوله جدا مش بس من البرتقال والجوافة زي ما كلنا عارفين لكن كمان الفلفل الأخضر والفراولة والبطاطس والبطاطة والكيوي غنية جدا بفيتامين سي

تالت حاجة فيتامين A

واللي ليه دور مهم زي البروتين وفيتامين سي في زيادة المناعة وإلتئام الجرح وكمان بيقاوم اي التهابات ممكن تحصل مكان الجرح

ودا ممكن تاخده متصنع جاهز في الأسماك أو جسمك بيعمله من حاجه اسمها البيتاكاروتين ودي موجودة في الجزر والبطاطا والفلفل الأحمر والمشمش والورق الأخضر زي السبانخ وكمان في المانجا

( يعني المانجا طلع ليها فوايد بس احنا اللي بوظنا سمعتها وقولنا إنها بس بتزود الوزن وبتعمل حصوات الكلى)

وأخيراً أوعي تنسي تاخد الأكل الغني بالألياف زي الخضروات ( وخاصة الخضروات الورقية ) الفاكة المجففة ( التين المجفف – المشمشية – القراصية) والتفاح والكمثرى والشوفان وبذور الكتان المطحونة ودا لإن الألياف بتحميك من الإمساك بعد العملية!!!

ايوا ممكن يحصل إمساك بعد العملية بسبب أدوية التخدير اللي أخدتها أثناء الجراحة والمسكنات وقلة الحركة والتوتر ومع الألياف لازم تشرب ماية كويس

بعد العملية …. حمدلله علي سلامتك وشد حيلك وكل كويس

Eat well …. Heal well

(فراخ – زبادي – فراولة – بطاطا – تين مجفف – قراصية – ماية )